Барселона мухлислари сайти FK "Barcelona" фанатлари сайти

Уикенднинг марказий учрашувида "Реал" муҳташам "Сантьяго Бернабеу"да Ла Лига етакчиси "Барселона"ни қабул қилади. "Эль Класико" ўз-ўзидан улкан масштабдаги воқеа, бугунги баҳс эса бир қатор қўшимча саволларга жавоб топиши билан янада муҳим аҳамият касб этмоқда.

Биринчиси – асосий учрашув арафасида дисквалификацияси тугаган Луис Суарес майдонга тушириладими? Агар каталонияликлар устози Луис Энрикенинг сўзларига ишонсак, уругвайлик футболчи ҳеч бўлмаганда қанчадир миқдорда ўйин амалиётиuf барибир эга бўлади.  

Иккинчиси - Лионел Месси Ла Лиганинг сўнгги рекордини янгилаб, Испания чемпионати тарихидаги энг яхши тўпурарга айланадими? Шанба оқшомида аргентиналик футболчи мутлақ рекордчига айланиши учун дубл қайд этиши керак.  

Учинчиси – фантастик жисмоний тайёргаликка эга бўлиб турган Криштиану Роналду ва унинг жамоаси ҳозирча ўз дарвозасидан бирорта гол ўтказиб юбормаган "Барселона" посбони Клаудио Бравони хатога қилишга мажбур эта оладими?

"Реал" – "Барселона"
Учрашув вақти: 21:00 
Стадион: "Сантьяго Бернабеу" (Мадрид)
Расмий учрашувлардаги ўзаро ўйинлар статистикаси: + 91 = 48 – 89
Бош ҳакам: Хиль Мансано (Эстремадура)

Бир неча йиллар муқаддам "Реал" ва "Барселона" ўзаро шу қадар кўп тўқнаш келишардики, натижада "Эль Класико" ўзининг ҳақиқий жозибаси ва қийматини секин-аста йўқота бошлаганди. Бироқ вақт ўтгани сайин йилнинг энг муҳим тўқнашувларидан бири яна ўз мавқейини тиклаб олди. Аммо нафақат Испаниянинг, балки жаҳоннинг энг кучли жамоалари ўртасидаги рақобат ва кураш ҳисси ҳеч қаерга йўқолгани йўқ. Аввалги йиллардан фарқли равишда бу йилги "Эль Класико" мавсум стартига тўғри келмади. 

Жамоаларнинг машхур янги футболчилари аллақачон "Эль Класико" тарихига ўз номларини мухрлаб улгуришди. Неймар "Камп Ноу"даги баҳсда ажойиб гол муаллифига айланган бўлса, Гарет Бэйл Қирол Кубоги финалида ақлбоварқилмас тезлик намойиш этиб, "қаймоқранглилар"га титулни тақдим этди. Албатта, аргентиналик футбол юлдузи ҳам катта саҳнага чиқишдан сира тортинмайди – Лионель "Сантьяго Бернабеу"да хет-трикка эришиб, Испания чемпионатининг энг муросасиз учрашувлари тарихидаги тўпурар футболчи бўлиб турибди. 

Аммо ўтган мавсум ҳаммадан ҳам "Барселона" учун бироз омадсиз келди. Каталонияликлар "Реал"ни икки бор таслим қилиб, "Атлетико" билан икки марта дуранг ўйнаганларига қарамай совринлардан қуруқ қолишди. Чемпионлик "матрасчилар"га насиб этди, Мадриднинг бош жамоаси эса Европа Чемпионлар Лигаси ва Қирол Кубогида зафар қучди. Ушбу факт бугунги тўқнашувга янада кескинлик бағишлаши табиий. 

Бундан ташқари "Реал" етакчиси португалиялик Криштиану Роналду айни вақтда фавқулодда ажойиб формага эга бўлиб турибди. CR7 миллий чемпионатнинг 7 учрашувида рақиблар дарвозасига 15 бор тўп киритган. Ўз навбатида каталонияликлар дарвозабони Клаудио Браво қаторасига 8 ўйиндан бери ўз дарвозаси дахлсизлигини сақлаб келаётгани билан мақтаниши мумкин. Шубҳасиз, иккала футболчининг кўрсаткичлари ақлни шошириб қўяди, аммо шу ўринда уларнинг ҳозирги натижаларида жамоадошларининг ҳиссаси катта эканини ҳам ёддан чиқармаслик зарур. 

Криштианунинг жамоадошлари мунтазам равишда португалиялик футболчи учун кўплаб қулай вазиятларни юзага келтириб беришаётган бўлса, Клаудионинг шериклари имкон қадар дарвозабон ишини енгиллаштириш учун тер тўкишмоқда. Тўғри, бу борада истисно бўлишини ҳам кўзда тутиши керак. Биламиз, Роналду исталган вазиятда эпчил ҳаракатлари билан бемалол бир ўзи ўйин тақдирини ҳал қилиши ёки Браво ҳимоядаги кемтиклардан кейин ҳам "блаугранас"лар жонига оро кириши мумкин.

Хўш, бугунги оқшомда кимнинг омадли серияси давом этаркин, португалиялик тўпурарлигини намойиш этишни давом эттирадими ёки Браво ўз исми-шарифига мос ўйин кўрсатадими? Бу ҳам кун тартибидаги қайноқ мавзулардан бири.  

Аммо кўпчилик эътибори ва қизиқиш марказида бўлиб турган жиҳат бу Лионель Мессининг Тельмо Сара рекордига яқинлашиб келаётганидир.  "Эль Класико"лар рекордчиси жорий мавсумда чемпионатда бор йўғи 7 та гол киритди, аммо 8 бор шерикларини самарали узатма билан таъминлади. Бироқ бу нарса ҳеч кимни ташвишга солаётгани йўқ. Ахир барча Мессининг ноёб иқтидоридан, айниқса, унинг "Реал"га қарши қандай тўп суришидан яхшигина хабардор. Бундан ташқари бугун Мадридда "Барса" етакчиси Испания чемпионатлари тарихидаги энг яхши тўпурарга айланиши ҳам мумкин. 

Айни вақтда Неймар 8 та голи билан жамоасининг жорий мавсумдаги энг яхши тўпурари бўлиб турибди. Шунингдек, бугунги ўйин арафасида ЖЧ-2014да анча шов-шув кўтариб, ФИФА томонидан интизомий жазога лойиқ кўрилган, ёзда Туманли Альбиондан Каталонияга кўчиб ўтган Луис Суареснинг дисквалификацияси ҳам якунига етди. 

Суарес билан юзага келган можаро ва унинг шундай ўйинда майдонга қайтиши –бугунги учрашувга бўлган қизиқишнинг янада ортишига хизмат қилувчи фактор. Тўғри, эҳтимол уругвайлик форвард ёрқин ўйин кўрсатмас ёки умуман майдонга тушмас. Аммо гап "Сантьяго Бернабеу"даги "Эль Класико" ҳақида кетар экан, Луис ушбу "блокбастер"да энг муҳим ролни ўйнаши мумкин бўлган футболчилардан бири саналади. Суареснинг майдонга тушиб, учрашув қаҳрамонига айланишидек варианти Голливуд фильмлари сценарийсини эслатиб юборади. Аммо футболчининг жорий мавсумда ҳали бирор расмий учрашувда иштирок этмаганини назарда тутсак, Луиснинг ўйинга бўлган иштиёқи нақадар юқори эканлиги ойдинлашади.

Агар Суарес тимсолида "Эль Класико" ўзининг янги қаҳрамонига эга бўлса, Бэйл мисолида ушбу тўқнашув ёрқин қаҳрамонини йўқотади. Футболчининг Боснияга қарши Евро-2016 саралаши доирасида жароҳат олгани туфайли Карло Анчелотти Бейлга бир ҳафталик таътил беришга қарор қилди. "Қаймоқранглилар" бахтига бошқа жароҳатланган футболчилар йўқ. 

Оёқ мушакларидаги оғриқ сабаб "Энфилд"да майдонга тушмаган Серхио Рамос куни кеча умумий гуруҳ машғулотларига қўшилди. Сами Хедира ҳам сафга қайтган. Мавсум стартини ўтказиб юборган германиялик таянч ярим ҳимоячи аллақачон ўз формасини тиклаб улгурди ва Ливерпулдаги ЧЛ баҳсида заҳирадан ўйинга қўшилди.

Айрим мутахассислар фикрича, "Реал" марказий ярим ҳимоясида Лука Модрич ва Тони Кроосдан кўра кўпроқ ҳимояда кўп меҳнат қилувчи футболчига эҳтиёж кучли. Хедиранинг қайтиши эса Карло Анчелотти учун яхши хушхабар. 

"Барселона" таркибида ҳам таняч футболчиси сафга қайтди. Серхио Бускетс жамоасининг охирги икки учрашувни ўтказиб юборганди, бироқ "Эль Класико" бўсағасида ўйинчи ҳеч қандай чекловларсиз машқ қилган. Бироқ шунга қарамай асосий таркибда унинг ўрнини Хавьер Маскерано эгаллаши ҳам эҳтимолдан ҳоли эмас. Айни вақтда испан матбуоти Маскеранонинг "Реал"га қарши учрашувда айнан майдон марказида тўп суриши вариантини анча жиддий муҳокама қилмоқда. Сабаби аргентиналик футболчи "Эйбар" ва "Аякс" жамоалари билан ўйинда айнан шу нуқтада ҳаракатланганди. 

Адриано ва Вермаленнинг бугунги баҳсда иштирок этиши сўроқ остида. Бразилиялик футболчи сўнгги вақтда мунтазам соғлиғи билан боғлиқ муаммоларга дуч келяпти. Бельгиялик футболчининг харид қилиниши эса кўплаб саволларни келтириб чиқарди.

Агар сўз жамоаларнинг ҳозирги жисмоний ҳолати ҳақида кетса, у ҳолда "Реал" ҳам, "Барселона" ҳам бугунги баҳсга жуда яхши кайфият ва юқори спорт формасида етиб келганини алоҳида таъкидлаш ўринли. 

"Эль Класико" олдида жамоаларнинг турнир жадвалидаги ўрни, уларнинг чемпионатдаги бошқа рақибларга қарши аввалги ўйинлари умуман аҳамиятсиз бўлиб қолади. Шундай бўлса-да, турнир жадвалидаги ҳолат учрашув якунлангач муҳокама марказида бўлиши аниқ. 

Айни вақтда жамоаларнинг турнир жадвалидаги вазияти қуйидагича: 

Ў     Жамоа                   Ў     Ғ     Д     М     ТН     О
1     "Барселона"            8     7     1     0     22:0     22
3     "Реал"                     8     6     0     2     30:9     18

Агар "Барселона"нинг биринчи ўринда бораётгани ва "Реал"ни тўрт очкога ортда қолдираётгани инобатга олсак, бугун каталониялик футболчилар "Сантьяго Бернабеу"да ўзларини анча хотиржам ҳис қилган ҳолда тўп суришларини таҳмин қилиш мумкин. Аммо бу масалага бошқа тарафдан назар ташласак, "Реал"

олдинда узоқ ва мураккаб давом этувчи ўйинлар борлигини англаб, бугунги учрашувга "ё бугун ё ҳеч қачон" қабилида ёндошиб, очколар тафовутини йўққа чиқариш учун бор кучини сарфлаши ҳам ҳеч гапмас. 

КИМ НИМА ДЕДИ?

Карло Анчелотти, "Реал" бош мураббийи: "Менимча, дунёдаги бошқа бирор учрашув ҳам ҳужум, ҳам ярим ҳимоя ва ҳам ҳимояда бу қадар юқори савияли ўйин намойиш қилинмаса керак. Бу ўйин қайсидир маънода чемпионлик тақдирини белгилаб беради деб ўйламайман. Биз ўз услубимизда тўп суришни истаймиз. Ғалаба қозониш учун учрашувда ниҳоятда ишончли ва ажойиб футбол ўйин ўтказишимиз керак" ("Реал" расмий сайти).

Криштиану Роналду, "Реал" ҳужумчиси: "Эль Класико нима сабабдан шанба куни ўтказилаётганини тушунмаяпман. Бу каби муҳим учрашувлар якшанба кунига белгиланиши керак. Танаффуснинг 2 ёки 3 кунга чўзилиши қай даражада катта фарқ эканини исталган профессионал тасдиқлаши мумкин. Шу сабабли "Барселона" кичик устунликка эга бўлади" (Football Espana).

Луис Энрике, "Барселона" бош мураббийи: "Учрашувга одатий баҳс каби тайёргарлик кўрамиз ва майдонда ҳам шундай кайфиятда тўп сурамиз. Биз тўпни ўз назоратимизга олиб, учрашувда устунликка эга бўлишни ва имкон қадар кам хатога йўл қўйишни режалаштиряпмиз" ("Барселона" расмий сайти).

РАҚАМЛАР СЎЗЛАГАНДА…

 – Испан грандлари бугунгача ўзаро 227 та расмий учрашувда тўқнаш келишган. Бу борада кичик устунлик мадридлик футболчилар тарафида – 91 ғалаба,  88 мағлубият, 48 дуранг. Киритилган ва ўтказиб юборилган тўплар фарқи ҳам "Реал" фойдасига: 384-368. 

 – Ла Лига доирасида 168та Класико ўтказилган. Қироллик клуби 70 та учрашувда ғалаба қозонган бўлса, каталонияликлар 66 та баҳсда зафар қучишган, 32 та ўйин дуранг билан хотима топган.

 – Ўтган мавсум чемпионатдаги ҳар иккала ўйинда ҳам кўк-анорранглилар азалий рақибларини таслим этишди. 

 – "Барселона" ҳозирча кучли бешликка кирувчи чемпионатларда ўз дарвозасидан бирорта тўп ўтказиб юбормаган ягона жамоа бўлиб қолмоқда.

 – Ўз навбатида жорий мавсумда 30 та тўп киритган "Реал" энг самарали жамоа. "Қаймоқранглилар" ўзларининг охирги 5 учрашувидан тўрттасида рақиблар дарвозасига бештадан ортиқ гол киритишди.
 
 – "Барселона" ва "Реал" мавсумдаги энг тартибли жамоа бўлиб қолмоқда: иккала жамоа ҳисобида бор йўғи 12 та сариқ карточка мавжуд. 

 – Биргина гол Лионел Мессига Испания чемпионати тарихидаги энг яхши тўпурар Тельмо Сарра (251 гол)га етиб олишни таъминлайди. Дубль эса аргентиналик футболчини мутлақ рекордчига айлантиради.
 
 – "Олтин тўп"нинг тўрт карра соҳиби шнингдек, Эль Класико тарихидаги энг яхши тўпурар ҳам ҳисобланади – 21.