Барселона мухлислари сайти FK "Barcelona" фанатлари сайти

Европа чемпионлар лигасининг навбатдаги тури ҳам ортда қолди. Бир қатор кучли жамоалар плей-офф масаласини ҳал қилиб, ўз эътиборларини мамлакат чемпионатларига қаратадиган бўлишди. Баъзилар эса ҳамон 1/8 финал йўлланмаси учун курашни давом эттиради. Турнинг эътиборга лойиқ натижаси - “Барселона” ҳужумчиси Лионель Мессининг Рауль рекордига етиб олганлиги бўлса, турнинг сенсацияси ЦСКАнинг “Этихад”даги ғалабаси бўлди. Шу ва бошқа қизиқарли хабарлар карикатураларда.

Месси Роналдудан ўтди, Раульга етди

“Барселона”нинг Испания чемпионатидаги кетма-кет икки мағлубиятдан сўнг кўпчилик, ҳатто Аргентина терма жамоаси устози Херардо Мартино Мессининг аввалги ҳолатига қайта олишига шубҳа қилган эди. Аммо Месси ўз сўзини айтди ва уни унутиб юборганларга ким аслида ким эканини яна бир бор эслатди. “Аякс”га қарши учрашувда дубль муаллифи бўлган Лео Месси Еврокубоклардаги голлар сонини 71 тага етказиб, Роналдудан ўтиб, Рауль рекордини такрорлади.

Шу билан биргаликда аргентиналик футболчи ўз жамоасининг муддатидан аввал плей-офф босқичига чиқишини таъминлади. ЕЧЛ 4-туридаги хизматлари учун УЕФА Мессини рамзий терма жамоага қўшиб қўйди.

Бир қатор рекордларни йўққа чиқарган Мессида яна бир вазифа қолди: Тельмо Сарранинг Ла Лигада киритган голларига етиб олиш. Месси ҳали ёш ва кучга тўла. Умид қиламизки Сарранинг рекорди ҳам тез орада янгиланади.

Криштиану Роналду ушбу турда ўзини кўрсата олмади. “Ливерпуль” билан баҳсда португалиялик футболчи ҳарчанд уринмасин Симон Миньоле дарвозасини ишғол қила олмади ва 13 ўйин давом этган голли сериясига нуқта қўйди. Мазкур учрашувдан аввал, “Ливерпуль” бош мураббийи Брендан Рожерс Роналду гол ура олмаслигига умид қилганди. Яхши ният ярим давлат деганларидек, Рожерснинг нияти рўёбга чиқди.

Яя Туре бўлса сизда, Сейду Думбия бор бизда...

ЕЧЛ 4-турининг сенсацион натижаси “Этихад” стадионида қайд этилди. Манчестер дербисида “МЮ”ни мағлуб қилган “шаҳарликлар” (0:1), бамайлихотир ЦСКА билан баҳс олиб боришга умид қилган эди.

Ўтган турда “армиячилар”дан етарлича сабоқ олмаган “Ман Сити” футболчилари бу сафар ўз майдонида рақибига имкониятни бой берди (1:2) ва турнир жадвалидаги ҳаолатини расво ҳолатга келтирди. ЦСКА ҳужумчиси Сейду Думбия эса катта муаммолар келтира олишини барчага намойиш қилди.

мазкур учрашувда Фернандиньо ва Яя Туренинг майдондан четлатилиши ҳам “армиячилар”га анча қўл келди.

“Арсенал” «қовун туширди»

Ушбу турда “Арсенал” ҳам кутилмаган натижани қайд этди. Учрашув давомида фаол ҳаракат қилган “тўпчилар” 61 дақиқада 3:0 ҳисобида олдинда бораётган эди. Аммо тўсатдан Венгер шогирдлари ўзларини йўқотиб қўйишди ва кетма-кет учта голни ўз дарвозаларидан олиб чиқишди.

Дуранг натижа ҳам натижа, бироқ учта голни фарқини йўққа чиқариш беъманилик. Арсен Венгер учрашувдан сўнг ҳайрат ва дарғазабда эканини айтиб ўтганди.

Интизомсиз Жерар Пике

Луис Энрике шогирди Жерар Пикени сўнгги икки учрашувда (“Сельта” ҳамда “Аякс”га қарши учрашувлар) асосий рўйхатга киритмаяпти. Сабаби эса, испаниялик ҳимоячи заҳира ўриндиғида уяли телефон ўйнаб ўтирганлиги учун Луис Энрикенинг интизомий санкциясига тушиб қолган. Бартра ҳам "қулоқсизлиги" учун асосий таркибда етарлича амалиётга эга бўлмаяпти. Ҳозирда Пике ва Бартра ўз жамоадошларини фақатгина қўллаб-қувватлаш имконига эга.

Саҳифа сўнггида, барча карикатура усталарига ўз миннатдорчилигимизни билдириб, уларнинг келгуси ижодларида муваффақиятлар тилаймиз.